ROXAS CITY – Amat-amat na nga nagapadulong ang mga tawo sa baligyaan sang mga bulak sa Halaran, Plaza sa siyudad sang Roxas subong nga nagahilapit na ang pista minatay.
Sa interview sang Bombo Radyo kay Manang Bibing Dela Peña, vendor sang bulak ginpahayag sini nga madamo na sang mga bumalakal ang nagapadulong agud magbakal sang bulak para sa ila nagtaliwan nga mga himata.
Ginpahayag sini nga subong pa lamang madamo na sang nagabakal nga mga bulak bangud humalin sa Oktubre 29 tubtob Nobyembre 4 pagasiraduhan ang tanan nga mga patyo sa pungsod agud malikawan ang pagdagsa sang mga tawo sa adlaw sang tigkalalag.
Aminado si Manang Bibing nga apektado ang ila nga negosyo subong nga tuig apang wala ini sang mahimo bangud para man ini sa tanan agud malikawan ang paglapta sang COVID-19 virus.
Pag-abot naman sa presyuhanay sang mga bulak nagabili ang mga ini humalin sa P200 tubtob P1,500 ang kada arrangement ukon bundle depende sa klase kag kadamuon sang bulak.
Samtang, posible naman nga magasaka ang presyu sang bulak sa madason nga semana.
