ROXAS CITY – Nangin mahinay ang pagbaligyaanay sang karne sang baboy sa Teodoro Arcenas Trade Center (TATC) sining syudad, sumugod nga naglupok ang ginakahangaw-an nga African Swine Fever (ASF) sa probinsya.
Sa interview sang Bombo Radyo kay Junjun Palangre vendor sang karne sang baboy, ginpahayag sini nga nagakuha pa sila sang suplay sang baboy sa Negros, Antique kag Guimaras.
Suno kay Palangre, may yara paman sang naga-atipan sang baboy sa probinsya partikular sa segundo distrito apang gamay na lamang bangud sa kahadlok nga malugi liwat bangud sa nagtupa nga virus sa mga baboy.
Mahibaluan nga sa karun ang presyo sa kada kilo sang Tiil yara na sa P300.00, Liempo P380.00, Lumo P380.00, Pork chop nga may kilo P350.00, Ulo P200.00, Atay P280.00, Unod P380.00, Buto-buto P350.00, Kasudlan (special) P200.00, (ordinary) P180.00 kag kasim nga may presyo P380.00.
Ginpahayag man ni Palangre nga kung sadto anay nagakatay pa sila sang 3 tubtob 5 ka baboy sa sulod sang isa ka adlaw, subong yara na lamang sa 1 tubtob 2 ang sarang nga mabaligya kag kung kaisa indi pa ini maubos.
Matandaan nga sumugod nagtupa ang ASF sa probinsya, ginatos nga mga baboy ang naapektuhan kag nagkalamatay kung sa diin ini ang nagtulod sa mga negosyante nga mag-untat sa pagnegosyo tubtob nga wala pa sang nagakaigo nga ginahatag nga bulong ang gobyerno probinsyal.
