Labi nga nagluya ang balor sang piso sa pagsirado sang trading subong nga adlaw, Marso 23, matapos makarekord sang foreign exchange rate nga P60.300 kada US dollar.
Ini ang pinakamanubo nga balor ukon all-time low sang piso sa kasaysayan sang pagbayluhanay.
Mas manubo ini sa P60.100 nga narekord sang nagligad nga Huwebes, Marso 19, 2026.
Matandaan nga napabilin ang nasambit nga rate sa masunod nga mga inadlaw bangud wala sang trading sang Biyernes bangud sa selebrasyon sang Eid’l Fitr, kag sirado ang merkado sang weekend.
Suno sa mga analista, padayon nga apektado ang piso sang mga external factors kaangay sang mataas nga presyo sang langis kag geopolitical tensions sa Middle East nga nagatuga sang kabalaka sa pangkalibutanon nga ekonomiya.
Ang masunod nga mga semana ginalauman nga mangin kritikal para sa Bangko Sentral ng Pilipinas sa pagpatuman sang mga tikang agud mapabilin ang kalig-on sang piso batuk sa dolyar.
