Gin-lift na sang Pilipinas ang temporaryo ban sa pag-import sang poultry products halin sa Japan matapos gindeklarar nga bird flu-free ang pungsod.
Paagi sa Department Circular No. 40 sang Department of Agriculture, ginpahanugutan na liwat ang pag-import sang domestic kag wild birds, lakip na ang day-old chicks kag hatching eggs halin Japan.
Suno sa DA, ang Japan isa ka importante nga ginahalinan sang mataas nga kalidad nga breeding stock kag hatching eggs nga kinahanglanon sa pagpadayon kag pagpasangkad sang produksyon sang manok sa Pilipinas.
Ginpahayag ni Department of Agriculture Secretary Francisco Tiu Laurel Jr. nga science-based ang desisyon agud mabalanse ang food security kag proteksyon sa lokal nga industriya sang manok, samtang nubo na ang risgo sang bird flu contamination halin sa poultry imports sang Japan.
