ROXAS CITY – Ginkumpirmar sang bana ni Carina Abuyan Oliveros alias ‘Carina Jovelyn Oliveros’ nga anay katapo sang Communist Party of the Philippines – New People’s Army (CPP-NPA) ang iya asawa apang madugay na ini nga nagpanaug kag nadesisyonan nga biyaan na ang nasambit nga grupo.
Sa pakig-angut sang Bombo Radyo kay Juvel Bangud, ginsiling sini nga madugay na nga nag-aku ang iya asawa nga miyembro ini sang NPA antes pa man sila makapauli sa probinsya sang Capiz.
Suno diri, desidido si Oliveros nga magbag-o para sa ila pamilya kag kabataan.
Nagpanindugan man si Bangud nga wala na sang anuman nga koneksyon sa nasambit nga organisasyon ang iya asawa kag wala na sang intensyon nga magbalik pa.
Matandaan nga ginserbihan sang mandamiento de aresto si Carina Abuyan Dela Cruz pinaagi sa gintingub nga pwersa sang Pontevedra PNP, CPMFC, CIDG kag PDEU Capiz sa Barangay Lantangan banwa sang Pontevedra kahapon nga adlaw, Setyembre 19.
Mahibaluan nga kaso nga murder ang ginapangatubang sang naaresto.
Samtang, ginkumpirmar man ni PMaj. Syril Punzalan, hepe sang Pontevedra MPS nga miyembro sang Medic Political Guide sang 1st Platoon Bataan-Zambales, Provincial Party Committee sang Central Luzon kag Regional Committee sang CPP-NPA si Oliveros.
Sa karon, nagapabilin ang suspek sa Pontevedra MPS kag natalana nga igaturn-over sa CIDG-Capiz.
