ROXAS CITY – Tuman ang kasubo kag kaakig nga nabatyagan sang bana sang biktima nga ginaalegar ginhimuslan kag ginpatay sa Barangay Lonoy, banwa sang Sapian.
Sa interview sang Bombo Radyo kay Rogie Alcatura, bana sang biktima, nagapati siya nga ang suspek nga si Ludovico Vera Evarista, isa ka senior citizen ang nagpatay sa iya asawa bangud kalabanan nga tawo sa ila barangay siya ang ginatudlo.
Suno diri, may yara sang testigo nga makapamatuod sa nagluntad nga krimen apang ulihi na ini nagpresentar sang iya kaugalingon bangud man sa kahadlok para sa iya gamay pa nga bata, apang wala siya ginpatulog sang iya konsensiya kag nagpadulong ini kay Alcatura agud magsugid sang iya nahibaluan.
Dugang pa sini, suno sa testigo antes nagluntad ang krimen nabatian niya ang suspek nga nagsinggit “Kun sin-o man ang mag-agi diri (duta nga ginapanag-iyahan sang suspek) ukon magkuha sang akon tanom, patyon ko”.
Gintuad pa ni Alcatura nga wala sang kamatuoran ang ginhambal sang suspetsado nga sa sulod sang 34 ka tuig nga pagpuyo wala siya sang kaso sa barangay, indi man matuod nga mag-abyanay sila bangud suno diri wala sang abyan ang nasambit nga suspek bangud ginaalegar may “saltik” ukon sakit sa paminsaron ini.
Kulang pa suno diri ang pagkapreso ni Evarista sa karumaldumal nga ginhimo sini sa iya asawa bangud magapabilin ini sa malawig nga tion sa ila paminsaron ilabi na sa ila bata.
