DAO, CAPIZ- Ginkumpirma sang mga kapulisan sang Dao Muncipal Police Station nga ang bangkay nga nasapwan sa Panay River sa Barangay Poblacion Ilaya, Dao, Capiz ang biktima sang mauling incident sa Sitio Polion, Barangay Apero, Tapaz, Capiz nga natabo lang sang tinalikdan nga adlaw sang Sabado, Oktubre 25, 2025 takna las 9:45 sang gab-i.
Ang biktima ang amo si alyas ‘Bob’, 36-anyos samtang ang suspek amo si alyas ‘Glen’, 47-anyos kag lunsay mga residente sang Sitio Polion, Barangay Apero, Tapaz, Capiz.
Sa interview sang Bombo Radyo kay Police Captain Rian Ampoyos, Hepe sang Dao Municipal Police Station, iya ginpahayag nga pamaagi sa pagpanawag sang Punong Barangay sang Poblacion Ilaya, Dao, takna las 2:45 sang hapon sang Oktubre 27, 2025, nahibaluan sang ila nga talatapan nga may nasapwan nga bangkay sa amo nga lugar.
Suno kay Ampoyos, ang amo nga bangkay ang gilayon man nga gindala sang mga katapo sang Dao Emergency Response Unit sa isa ka punerarya sang amo man nga banwa.
Pahayag nya, ginpakig-angutan nila ang Tapaz Municipal Police Station bangud nga nahibaluan man nila nga may ginpahayag nga nadula nga indibidwal kag ginalalip ini sang pamilya.
Gilayon naman ini nga ginpadulungan sang mga katapo sang Tapaz Municipal Police Station kaupod ang pamilya sang biktima kag didto ginkumpirma nga ila gid nga himata ang amo nga bangkay nga nasapwan. Sa subong, ginpabilin na sang Dao Municipal Police Station ang imbestigasyon sa Tapaz Municipal Police Station kag ang dugang pa nga mga tikang para sa nagakaigo nga disposisyon may kaangtanan sa nasambit nga insidente.
Interviewed by Bombo Sunnie Mae Constantino Batencila
