ROXAS CITY – Nagapakabakod sa karon ang pamilya Agupitan kasunod sang pagkapatay sang ila himata nga si Patrolman Rex Agupitan nga isa sa apat ka mga pulis nga napatay sa pagkahulog sang 6×6 truck sang Philippine National Police sa Barangay Ginomoy, Alimodian, Iloilo.
Ini ang ginpahayag ni Julius Agupitan, utod ni Patrolman Agupitan sang mainterview sang Bombo Radyo.
Suno diri nga indi halos ini makapati nga napatay na ang iya magulang nga suno sa iya madamo pa kuntani sang handom para sa iya pamilya.
Apang ginpahayag ni Julius nga sa pihak sini nagapakabakod sila nga mag-ululutod kasunod sang pagtaliwan sang amo nga pulis.
Mahibaluan tumandok sang Panay si Patrolman Agupitan apang nakahaya ang bangkay sini sa Ilas Sur, banwa sang Dao nga amo ang lugar sang iya asawa.
Mahibaluan nga magluwas kay Patrolman Agupitan, kalakip man sa Capizeño nga napatay sa nasambit nga aksidente amo si Patrolman Antonio Tumanday Jr. nga nahaya naman sa Barangay Dinginan, Roxas City.
Samtang ginpahayag naman ni Capiz Police Provincial Office Director Julio Gustilo Jr. nga may yara sila sang igatan-ay nga bulig sa pamilya sang duha ka mga Capizeño nga napatay sa nasambit nga aksidente.
Suno diri nga indi man pagpabay-an sang gobyerno ang pamilya sang nagtaliwan nga mga pulis bangud may ihatag nga ayuda sa ila.
Gindugang pa ni Gustilo nga nagaupod sila sa pagkalisod sang pamilya sang duha ka mga pulis sa pagtaliwan sang ila mga himata.
