Napauli na sa India ang mga bangkay sang 45 nga mga empleyado nga Indian nationals nga napatay sa nasunog nga residential building sa Mangaf city, Kuwait sadtong Miyerkules.
Mahibaluan una nga ginsiling sang Kuwaiti authorities nga yara sa 50 ka mga indibidwal ang napatay sa sunod kalakip na ang 45 nga nagikan sa India, 3 ang nagikan sa Pilipinas samtang 2 pa ang padayon nga ginahibalo.
Suno kay Indian Minister Kirti Vardhan Singh nga personal nga nagpadulong sa Kuwait matapos ang insidente, nagpatigayon na sang DNA tests agud matumod ang pagkakilanlan sang mga biktima.
Kalakip sa mga emplelyado nga Indian national nga nakumpirmar nga napatay ang 23 nga nagikan sa Kerala state, 7 nagikan sa Tamil Nadu, tig-3 naman sa Andhra Pradesh kag Uttar Pradesh, 2 ang nagikan sa Odisha kag tig-1 nagikan sa Bihar, Punjab, Karnataka, Maharashtra, West Bengal, Jharkhand kag Haryana.
Dugang pa sang Indian Minister, gin-areglo sang Indian government ang isa ka special Air Force flight agud mapauli ang mga bangkay sang napatay.
Naghugpa ini sa Kochi city sang Kerala aga sadtong Biyernes kag gindala sa Delhi.
Dinosena naman nga mga Indial national ang napilasan bangud sa nasambit nga sunog.
Samtang, ginanunsyo sang state kag federal governments nga magatan-ay sila sang kompensasyon sa nabilin nga pamilya sang mga biktima.
