ROXAS CITY – Nag-abot na sa Barangay Cabugao Oeste, Panay Capiz ang bangkay sang Capizeño nga soldado nga napatay sa nagapadayun nga engkwentro sa tunga sang tropa sang gobyerno kag maute terror group sa Marawi City.
Emosyunal ang pamilya ni PFC Johnro Vista 21-anyos katapu sang 15th Infantry Battalion na-assign sa Marawi City sang makita ang bangkay sang ila nga himata sa sulod sang lungsod.
Suno kay Corporal Roy Dueño, kaupod sang biktima nga ginsulod sang ila nga tropa ang isa ka balay sa Marawi City, apang dimalas nga naigo ang lider sang squadron.
Sa pihak sang mainit nga pagbayluhanay sang luthang sang magtimbang nga bahin, maisog nga ginkuha ni Vista ang pilason nga kaupod kag dinala sa hilway nga lugar.
Matapos makuha sang chopper ang pilason nga nga kaupdanan nagbalik ini sa area apang lipod sa iya nga ihibalo nga pagsulod sini sa balay nakita na ini sa buho sang hagdanan sang sniper nga maite nga nagluthang sa iya sa dughan.
Nagkamang pa ang kaupod nga soldado ni Vista padulong sa iya kag ginpasandig pa ini sa pader antes nabugtuan sang ginhawa.
Nahibaluan nga tatlo ka tuig pa lamang sa serbisyo sa Philippine Armys si Vista kag una nga assigment sini ang syudad sang Marawi.
