Bangkay sang Capizeño soldier nga napatay sa engkwentro sa Negros Occidental, nahamyang na sa ila balay

ROXAS CITY – Nahamyang na sa ila balay sa banwa sang Dumalag, Capiz ang bangkay sang Capizeño soldier nga napatay sa nagluntad nga engkwentro sa tunga sang militar kag New People’s Army sa Sitio Buyoron, Barangay Buenavista, Himamaylan City, Negros Occidental.

Ginpahayag ni Lt. Col. Egberto Dacoscos, battalion commander sang 62^nd Infantry Battalion Philippine Army nga naba-se sa Negros Occidental nga ginsugat sang iya mga ginikanan ang bangkay ni Private 1^st Class Joel Farinas kag nag-upod man sa pagdul-ong sa probinsiya sang Capiz ang mga kaupdanan nga soldado.

Suno sa opisyal may mabaton nga benepisyo ang pamilya sang biktima gikan sa AFP kag assistance sa DILG.

Matandaan nga nagapatigayon sang combat operation ang 62nd Infantry battalion sa lugar sang magsumalangay sila sang ginabulubanta 20 ka mga NPA members sang Central Negros Front.

Nagdugay sang 20 minutos ang pagbayluhanay sang luthang sang magtimbang nga bahin antes nagwithdraw ang mga rebelde.