ROXAS CITY – Nag-abot na sa probinsiya sang Capiz ang bangkay sang duha ka mga pulis nga kalakip sa apat nga napatay sa pagkahulog sang 6×6 truck sang Philippine National Police sa Barangay Ginomoy, Alimodian, Iloilo.
Nahaya karon sa balay sang pamilya Tumanday ang bangkay ni Patrolman Antonio Tumanday Jr., 31 anyos.
Suno kay Antonio Tumanday Sr., amay ni Patrolman Tumanday, wala gid sila magdahum-dahom nga isa na ka bangkay nga magaabot sa ila balay ang iya nga anak.
Ginpahayag sini nga madamo pa kuntani sang plano ang napatay nga si Patrolman Tumanday ilabi na nga may yara ini sang tatlo ka tuig nga anak kag nagatrabaho ang iya nga partner sa pungsod Kuwait.
Ginpahayag sang amay nga kapin sa tatlo ka tuig pa lamang sa serbisyo ang iya anak sumugod sang naging pulis sang tuig 2017.
Ginlaragway naman sang iloy nga si Gemma Tumanday ang iya anak bilang isa ka tawo nga mabuot, maalam kag madamo sang handom sa kabuhi.
Suno diri nga nagtinguha ang iya anak nga mangin isa ka pulis agud makabulig nga mapaumwad ang kabuhi sang iya nga pamilya.
Magluwas kay Patrolman Tumanday, kalakip sa napatay sa nasambit nga aksidente amo sanday Patrolman Rex Agupitan sang banwa sang Panay, Capiz, Police Corporal Emerson Peñarubia kag Patrolman Prince Angelo Supiter.
Mahibaluan nga nag-abot naman sa probinsiya ang bangkay ni Patrolman Agupitan kun sa diin nakahaya ini karon sa banwa sang Dao.
