ROXAS CITY — Nagakahangusbo subong ang pamilya sang isa ka soldado nga Capizeño nga napatay sa engkwentro sa tunga sang tropa sang gobyerno kag Maute terror group sa Marawi City.
Suno kay Gng. Emma Carillo, iloy sang napatay nga si PFC Alvin John Carillo sang Barangay Tawog, Sigma, Capiz mabug-at pa sa gihapon sa iya buot nga batunon ang natabo sa iya nga anak.
Ginpahayag sang ginang nga ginpamalabagan pa niya sadto ang anak nga magsulod sa militar bangud sa katalagman sang trabaho.
Apang ginlab-ot gid ni Carillo ang iya handum nga mangin isa ka soldado apisar nga graduate pa ini sang kurso nga hotel and restaurant management.
Ginpahayag pa sang ginang nga indi pa ini makapati sang nakalab-ot sa ila ang impormasyon nga napatay ang iya anak matapos nga maigo sang Maute sniper.
Nahibaluan nga katapusan nga nagpauli sa banwa sang Sigma si PFC Carillo sang bulan sang Nobyembre.
Tatlo pa lamang ka tuig sa serbisyo si PFC Carillo nga gilayon gindestino sa kampo sang 15th Infantry Battalion, Philippine Army sa Lanao del Norte.
Si Carillo nga isa pa ka soltero ang ikaduha sa anum ka mag-ululotod kag nagaisahanon man nga lalaki.
