TAPAZ CAPIZ – Ginpaidalum na sa post mortem examination, ang bangkay sang isa ka mangunguma nga ginluthang-patay sa guha sang Civic Center sa Barangay Abangay, Tapaz, Capiz.
Mahibaluan nga ginkilala ang biktima kay alyas Poldo, 41-anyos kag residente sa nasambit nga lugar samtang ang ginatudlo nga suspek ang ginkilala kay alyas Gardo, 36-anyos kag residente naman sang Barangay Nayawan sa nasambit nga banwa.
Sa pagakig-angut sang Bombo Radyo sa imbestigador sang Tapaz Municipal Police Station nga si PSMS. Roman Gueta, ginpahayag sini nga sang natabo ang insidente lunsay ang mga ini nga yara sa impluwensya sang makahulubog nga ilimnon.
Suno kay Gueta, base sa ila imbestigasyon wala sang daan nga hiligut-anon ang magtimbang nga bahin.
Matandaan nga nag-angkon sang patal nga pilas sa dughan ang biktima tuga sang pagpangluthang gamit ang ginasuspetsahan nga 12 gauge pistolized homemade shotgun nga armas-luthang.
Sa karun, padayon nga gina-ayam sang kapulisan ang nasambit nga suspetsado.
Panugyan sang imbestigador sa mga residente sa lugar nga kun tani makainum sang makahulubog nga ilimnon, kontrolon ang kaugalingon agud malikawan ang kasubong sini nga insidente.
