ROXAS CITY – Pilason nga ginpadangat sa ospital ang 42-anyos nga babaye matapos nga ginbanggan kag ginlampusan sang kahoy sa Barangay Talon, sining syudad.
Ginkilala ang biktima nga si Brigette Olisco samtang ang suspek amo si Gigi Santos, lunsay mga residente sang nasambit nga lugar.
Sandig sa imbestigasyon sang Roxas City PNP nag-ugat ang inaway sang duha sa wala pagpahulam sang washing machine sang tagreklamo.
Posible nga ginkaakig ini sang suspek nga nagpadala sang private message kay Olisco nga may kaundan nga malain nga mga mensahe.
Ginpa-blotter sa police station kag sa ila barangay sang biktima ang ginhimo sang suspek sa diin nag-atubang sila sa barangay hall kag ginhusay.
Apang ginkakibot na lamang sang Olisco sang ginbanggaan ni Santos kasunod ang paglampos sa iya sang kahoy.
Gilayon nagresponde ang mga katapo sang Capiz Emergency Response Team (CERT) kag gindala sa Roxas Memorial Provincial Hospital ang biktima agud madapatan sang nagakaigo nga pagbulong.
