Sarang bala ayhan mabuhinan ang konsumo sang gasolina paagi lamang sa paghalad sang isa ka ritwal?
Samtang nagapadayon nga nagaka-eksperyensyahan sang Russia ang krisis sa supply sang gasolina, nagadamo man ang mga manughiwit, mga manugpakot, kag iban pa nga self-proclaimed nga nagahimo sang esoteric practices, nga nagahalad sang mga ritwal agud mapanubo ang konsumo sang gatong sang salakyan.
Santo sa mga reports, ginagamit sang iban ang social media agud mag-advertise sang nagkalain-lain nga serbisyo, kalakip ang pagsikway sang sumpa sa salakyan kag pag-convert sang ordinaryo nga gasolina sa premium nga kalidad paagi lamang sa ritwal.
Suno sa mga nasambit nga mga occult practitioners, posible nga ang tuman kadasig kag masobra nga pagkonsumo sang gasolina ang tuga sang isa ka sumpa, negatibo nga enerhiya, ukon mga pagkabutang nga ginbilin sa sulod sang salakyan.
Sa baylo nga ipakay-o ang makina sa mekaniko, ila ginaagda ang mga motorista nga magpahimo sang mga ritwal kabaylo sang bayad nga nagalab-ot sa 16,000 rubles ukon kapin P10,000.
Sa isa ka insidente, ginbuyagyag sang isa ka manughiwit sa iya kliyente nga may sumpa nga ginbutang sa tangke sang gasolina sang salakyan, rason nga madasig ini maubos.
May pipila man nga nagahambal nga sarang nila i-convert ang kalidad sang gasolina sa mas mataas nga kalidad paagi sa mga ritwal.
Sa pihak sini, padayon nga naga-eksperyensya sang kakulang sa supply sang gasolina sa Russia, kon sa diin nagakapilitan ang iban nga magpabilin sa malaba nga pila sang pila ka oras agud makargahan sila sa tunga man sang padayon nga pagsaka sang presyo sang produktong petrolyo.
