ROXAS CITY – Ginkompirmar sang duha ka mga alkalde sang Pilar kag Sapian nga magapatuman sila sang temporaryo nga pag-untat sa pagbaton sang mga Locally Stranded Individuals (LSI’s) sa nasambit nga mga banwa sumugod subong nga adlaw Disyembre 5 tubtob Enero 5, 2021.
Mahibaluan nga pinaagi sa Resolution No. 85 sang Regional Inter-Agency Task Force (RIATF) nga ginpapanaog sadtong Nobyembre 30 gin-aprubahan ang “Time-Out” sa pagbaton sang mga LSI’S.
Sa interview sang Bombo Radyo kay Sapian Mayor Arthur John Biñas nga ginpakamaayo anay sini nga mag-request sa RIATF sang pag-untat sa pagbaton sang mga LSI’s agud makapahuway ang mga Medical Frontliners ukon Healthcare Worker subong nga paskwa.
Ginpahayag ni Biñas nga importante ang pag-intiendi sang kadam-an ilabi na sa mga frontliners nga nagapanikasog kag nagapakigbato sa dala nga halit sang Coronavirus Disease ukon COVID-19.
Suno naman kay Pilar Mayor Arnold Perez nga kinahanglan nga mahatagan man sang kahigayunan ang mga Frontliners nga padayon nga nagaserbisyo sang pahuway kag tion man nga makaupod ang ila pamilya subong nga paskwa.
Mahibaluan nga matapos ang ginpatuman nga Time-Out magabalik naman sa pagbaton sang mga LSI’s ang nasambit nga mga banwa.
Mahibaluan nga lima na ka mga kabanwahanan sa probinsya nga ginalakipan sang Dumalag, Jamindan, Panitan, Pilar kag Sapian ang temporaryo anay nga indi magabaton sang mga LSI’s sa sulod sang isa ka bulan.
Apang, sa pihak sang ginhinyo sang LGU sang Dumalagk padayon sa gihapon ang ila pagbaton matapos nga nagapanawagan subong ang mga LSI’s nga luyag magpaulli sa nasambit nga banwa.
