CAPIZ-Nagkampyon ang banwa sang Dumalag kag nangin madinalag-on nga local government unit (LGU) sa bug-os nga Western Visayas nga nakakuha sang Champion Award sa YAKAP and GAMOT Summit 2026 nga ginpatigayon sang PhilHealth Regional Office VI.
Dugang sa kampyonato, nakabaton man ang Dumalag sang Excellence Award in Population Coverage, una nga pwesto sa Virtus in Progresu kag Integrity Award in GAMOT Reimbursement.
Suno sa impormasyon, ginpatuman na sang lokal nga panguluhan sang Dumalag ang YAKAP kag GAMOT programs halin pa sa pagsugod sang termino ni Mayor Maria Concepcion “Khuku” T. Castro, bilang bahin sang ila paghatag prayoridad sa mga programa para sa ikaayong lawas sang mga pumuluyo.
Ang YAKAP ukon Yaman ng Kalusugan Program isa ka programa sang PhilHealth nga nagahatag sang mas malapad nga access sa primary health care services, samtang ang GAMOT nagahatag sang benepisyo para sa mga kinahanglanon nga bulong sang mga kwalipikado nga miyembro.
Ang apat ka pagkilala nagapakita sang resulta sang pagpatuman sang mga programa, partikular sa pagpalapad sang coverage sang mga benepisyaryo kag pagdumala sang pondo para sa health services.
Gin-abi-abi naman sang Gobyerno Probinsyal sang Capiz, sa pagpanguna ni Governor Fredenil H. Castro, ang kadalag-an sang Dumalag, lakip na si Mayor Khuku Castro kag ang tanan nga nagbinuligay sa pagpatuman sang mga programa sa panglawas.
Ang sini nga pagkilala nagabutang sa Dumalag bilang isa sa mga LGU sa Western Visayas nga nagpakita sang maayo nga performance sa pagpatuman sang mga programa sang PhilHealth para sa kaayuhan sang pumuluyo.
