Nagpagwa sang Executive Order No. 2026-33 ang Local Government sang Dumarao, Capiz nga nagadumili sa pagsulod kag paggwa sang tanan nga produkto halin sa baboy bangud sa kabalaka sa African Swine Fever (ASF).
Sa interview sang Bombo Radyo kay Dumarao Capiz Mayor Atty. Mateo Hachuela, iya ginpahayag nga ginpatuman ang amo nga Executive Order agud maprotektahan ang hog raisers kag posible paglapta sang ASF sa banwa.
Lakip sa mga ginadumilian sa pagsulod sa banwa amo ang buhi nga baboy, frozen nga karne sang baboy, processed pork products pareho sang ham, bacon kag sausage, luto nga pagkaon nga may unod sang baboy, kag iban pa nga pork by-products.
Nagapanawagan man ini sa kooperasyon sang mga residente, negosyante, transport operators, meat vendors kag hog raisers sa pagsunod sang amo nga executive order.
