Ginkilala sang Environmental Management Bureau sang Department of Environment and Natural Resources ukon DENR-EMB Western Visayas ang banwa sang Ivisan, Capiz, bangud sa maayo nga pagpatuman sang Solid Waste Management.
Lakip sa ginpabugal nga inisyatibo sang banwa amo ang pag-operate kag pagdumala sang Plastic-to-Chair Facility, nga nagaproseso sang plastic waste agud mahimo nga mga pulungkuan.
Sa interview sang Bombo Radyo kay Dr. Ernest C. Federiso, Officer-in-Charge sang DENR-Capiz, iya ginpahayag nga dako nga bulig ang mga nahimo nga pulungkuan sa mga eskwelahan, barangay kag mga banwa nga wala sang nagakaigo nga pondo para makabakal.
Suno kay Federiso, pinaagi sa amo nga programa, naganubo ang kadamuon sang plastic waste kag mapuslan pa ang mga plastic nga mahimo kuntani magdugang sa problema sa basura.
Nahibaluan nga ang banwa sang Ivisan isa sa siyam ka local government units sa Capiz nga nakabaton sang amo nga pagkilala.
