ROXAS CITY – Wala nakarekord ang banwa sang Ivisan sa nagalapta nga red tide toxin sa pila ka mga coastal area sa nagkalain-lain nga mga banwa.
Sa interview sang Bombo Radyo kay Felipe Neri Yap alkalde sang nasambit nga banwa, ginpahayag sini matapos ang ginkahangawa sang publiko nga paglapta kag pag-apekto sang nasambit nga toxin sa pila ka mga pumuluyo, gilayon nga gindulungan suno sa alkalde ang ila banwa sang Office of Provincial Agriculturist agud magkuha sang samples sa tubig agud masiguro nga luwas ang banwa sang Ivisan nga kuhaan sang mga panginhason.
Suno kay Yap, may yara sang 7 ka mga coastal area ang ila banwa nga ginakuhaan sang mga panginhason nga giabaligya sa pila ka mga merkado publiko.
Apisar nga wala pa sang narekord ang ila banwa, ginahulat sa gihapon nila suno sa alkalde ang resulta sang samples nga ginkuha sa ila kalalawran.
Panaglitan nga mangin negatibo ang resulta, ginpasiguro sini nga magahatag sila sang nagakaigo nga dokumento agud ipresentar sang mga manugbaligya sa mga customer nga luwas baklon kag kaunon ang ila mga baligya nga panginhason.
Apang sa tion nga mangin positibo naman ang resulta sang test, gilayon nga ipauntat sang alkalde ang pagpanguha, pagbaligya kag pagkaon sang nasambit nga mga shellfish.
Mensahe sini sa pumuluyo, mag-aligmat, pamatian kag sundon ang mga tikang nga ila ipatuman para sa kaluwasan sang tanan.
