Nakasulod sa regional level sang 2026 Search for Excellence in Local Governance ukon EXCELL Awards ang apat ka mga entry sang banwa sang Jamindan, Capiz.
Sa interview sang Bombo Radyo Roxas kay Mac Arthur Valdemar, Municipal Administrator sang Jamindan, iya ginpahayag nga isa ini ka kadalag-an para sa banwa bangud nagapakita ini nga mga programa kag inisyatibo para mapauswag ang serbisyo publiko kag mabuligan ang mga pumuluyo.
Suno kay Valdemar, ang apat ka mga entry nagalakip sa Sustainable Education, Environmental Management, Disaster Preparedness, kag Safety, Peace and Order.
Dugang pa sini, personal nga ginbaton ni Mayor Donnah T. Valdemar ang pagkilala para sa apat ka entries nga nakasulod sa regional level.
Nahibaluan ang ang banwa sang Jamindan ang may pinakadamo nga entries halin sa probinsya sang Capiz nga nakasulod sa regional level sang 2026 EXCELL Awards.
