ROXAS CITY – Nakabalhag sang 1 nga casualty ang banwa sang Jamindan, matapos ang pagbubo sang mabaskog nga pag-ulan nga nagresulta sang pagbaha sa nagkalain-lain nga mga lugar.
Sa interview sang Bombo Radyo kay Mac Arthur Valdimar alkalde sang banwa sang Jamindan, ginpahayag sini nga ang nasambit nga biktima isa ka senior citizen nga nagapang-edaron sang 70-anyos kag residente sang Sto. Rosario sa amu nga banwa.
Suno sa alkalde sa ila pagpangusisa sa pamilya sang biktima, nagpauli ang amu nga senior citizen sa ila puluy-an takna 6:00 sang gab-i, agud kun tani tsekyaron ang ila mga nabilin nga gamit bangud nag-amat-amat na sa pagnubo ang tubig.
Pasado 8:00 sang gab-i sang magpauli man ang pamilya sini, natalupangdan na lamang nila nga nagalutaw-lutaw na ang ila himata sa may bahin sang ila kusina nga wala na sang tubig-baha kag wala na ini sang kabuhi.
Ginpahayag man suno diri sang pamilya nga posible sang natabo ang insidente mataas pa ang tubig kag posible nalumos.
Mahibaluan nga nakainum sang makahulubog nga ilimnon ang amu nga biktima.
