ROXAS CITY – Nakapagkit sang pinakauna nga kaso sang Coronavirus Disease ukon COVID-19 ang banwa sang Maayon, Capiz.
Ini ang ginkumpirmar ni Mayor Raymond Malapajo sang mainterview sang Bombo Radyo Roxas.
Suno kay Malapajo nga isa ka Locally Stranded Individual ukon LSI ang nagpositibo sa COVID-19 gikan sa Quezon City, Metro Manila kag nagpauli sa probinsya sadtong Hunyo 29 sakay sa Starlite vessel kaupod ang iya asawa kag bata.
Ang nasambit nga mga LSI’s ang lunsay mga residente sang Barangay Aglimucon sang amo nga banwa.
Bangud diri ginpaidalom sa Rapid Test ang mga ini apang lunsay nag negatibo ang ila resulta.
Kasunod sini, ginpaidalom man sila sa 14 day strict home quarantine sa ila barangay.
Nahibaluan nga asymptomatic ang nasambit nga LSI bangud wala ini nakabatyag sang anuman nga sintomas sang COVID-19.
Magluwas diri, ginpaidalom man ini sa Real Time-Polymerase Chain Reaction ukon RT-PCR Test kag Hulyo 19 na naguwa ang resulta nga positibo ini sa nasambit nga balatian.
Ginpahayag man sang nasambit nga alkalde nga natapos na ang iya quarantine period sadtong Hulyo 13 rason nga nakaguwa na ini sa ila balay.
Apang, nagpasalig man si Malapajo sa mga residente nga nagapadayon ang contact tracing nga ginapatigayon sa amo nga banwa sa mga indibidwal nga nakahalubilo sini.
Sa karon, yara na sa quarantine facility sa ila banwa ang nasambit nga LSI.
Nagpanugyan man ang alkalde sa mga residente nga kun mahimo likawan anay ang pagguwa sa balay agud malikawan nga malatnan sang nasambit nga balatian.
Nagpasalig naman si Malapajo nga himuon nila ang tanan agud malikawan ang pagsaka sang kaso sang COVID-19 sa ila banwa.
