ROXAS CITY – ginpaidalum na sa state of calamity ang banwa sang Panit-an sa probinsiya sang Capiz bangud sa tuman nga pagbaha nga epekto sang ulan nga dala sang tropical depression Agaton.
Nagpasalamat si Mayor Generoso Derramas sa mga katapu sang Sangguniang Bayan sang Panit-an bangud gilayon nga gin-aprubahan ang ila ginrequest nga resolution nga i-deklara ang state of calamity sa 26 ka mga barangay sa nasambit nga banwa nga lubos nga apektado sang pagbaha, bangud ila na magamit ang calamity fund para mabuligan ang mga apektado nga mga pumuluyo.
Nagpasalamat man ang alkalde bangud sa pagbisita sa ila nga lugar ni OCD Regional Director Jose Roberto NuñEZ, bangud nakita sini ang sitwasyon sang banwa sang Panit-an kag nagpromesa nga himoon ang tanan agud mahatagan sang bulig ang mga apektado nga pamilya.
Suno pa kay Derramas nga ba-se sa inisyal nga assesstment sa mga nahalitan nga mga pananum sang baha, nagalab-ot ini sa P67 milyones.
Nahibaluan nga ang Panit-an ang pinakauna nga banwa sa dose ka mga ginbaha nga banwa nga nagdeklara sang state of calamity.
Samtang, ginatun-an na sang LGU sang banwa sang Pontevedra ang pagdeklara nga ipaidalum sa state of calamity ang ila nga lugar, bangud isa man ang ila nga banwa sa mga naapektuhan sang pagbaha.
Sa karon nagalab-ot na lamang sa 103 ka barangay sa 12 ka banwa sa Capiz ang apektado sang pagbaha kag 786 nga pamilya ang nagapabilin sa evacuation centers matapos nga nagpauli na ang kadam-an sa ila mga balay bangud sa pag-untat na sang ulan.
