ROXAS CITY – May yara na sang Local Transmission sang Coronavirus Disease ukon COVID-19 ang banwa sang Panitan.
Ini sandig sa opisyal nga pahayag nanday Mayor Katherine Dequiña- Belo kag Municipal Health Officer Rosine Delfin- Avelino kun sa diin ginkumpirmar ang Local Transmission sa amo nga banwa.
Ini ang kasunod sang pagpositibo sang mga masunod:
1. Isa ka babaye nga naga-edad 54 anyos, residente sang Tabuc Sur, Panitan. Wala sang “travel history” apang may “exposure” sa isa ka nauna na nagpositibo sa COVID-19;
2. Isa ka dalagita nga naga-edad sang 13 anyos, residente sang Tabuc Sur, Panitan. May exposure sa nagpositibo sa COVID-19;
3. 58 anyos nga lalaki, residente sang Tabuc Sur, Panitan. May exposure sa nagpositibo sa COVID-19;
4. 16 anyos nga dalagita, residente sang Tabuc Norte, Panitan. Wala sang “travel history” apang may “exposure” sa isa ka nauna na nagpositibo sa COVID-19;
kag
5. 15 anyos nga dalagita, residente sang Agbabadiang, Panitan. Sandig sa pagpangusisa sang Department of Health, may exposure ini sa isa ka pribado nga clinic kag pampubliko nga ospital.
Sa karun yara na sa Provincial Temporary Treatment and Monitoring Facility ang mga ini kag nagapabilin nga asymptomatic.
Ginpaidalum naman sa 14 ka adlaw nga quarantine ang panimalay sang mga natungdan kalakip na ang mga naka-close contact sang mga nagpositibo.
Sa karun nagdangat na sa 20 ang kabug-usan nga kumpirmado nga kaso sang COVID-19 sa banwa sang Panitan.
Bangud sa Local Transmission sang COVID-19, padayon ang panawagan sa mga pumuluyo nanday Mayor Belo kag Dr. Avelino nga magsunod sa mga polisiya kag ordinansa kalakip na ang mga nagakaigo nga protocol batuk sa COVID-19 agud malikawan ang paglapta sang COVID-19 sa nasambit nga banwa.
