ROXAS CITY – Ginpaidalom na sa state of calamity ang banwa sang Pontevedra, Capiz bangud sa padayon nga pagtimbuok sang kaso sang balatian nga dengue sa probinsiya.
Ini ang ginkompirma mismo ni Pontevedra Mayor Esteban Evan Contreras sang mainterview sang Bombo Radyo Roxas.
Ginpahayag sini nga siya mismo ang nagrekomendar sa ila nga Sangguniang Bayan nga ipaidalom sa state of calamity ang lugar agud ilabi pa nga matutukan ang kampanya kontra sa nasambit nga balatian.
Mahibaluan nga ang banwa sang Pontevedra ang nagapangaduha sa siyudad sang Roxas sa may pinakamadamo nga napagkit nga kaso sang nasambit nga balatian.
Sa masobra 200 nga nagpositibo sa nasambit nga balatian subong nga tuig sa amo nga banwa, may yara naman sang duha ka mga pasyente nga ginbawian sang kabuhi.
Kasunod sang pagpaidalom sa state of calamity sa nasambit nga banwa, mahimo naman magamit sang lokal nga gobyerno ang ila nga calamity fund agud mas mapasangkad pa ang ila nga kampanya kontra dengue.
