Ginpaidalum na sa state of calamity ang banwa sang Pontevedra bangud sa epekto sang Bagyo Ramil.
Sa interview sang Bombo Radyo kay Sangguniang Bayan Member Rolindo Bulan, Chairman sang Committee on Municipal Disaster Risk Reduction and Management Council (MDRRMC), iya ginpahayag nga pamaagi sang ila nga special session, nadesisyunan na nga magdeklara sang state of calamity bangud sa dako nga kahalitan nga ginbilin sang bagyo.
Suno pa kay SB Member Bulan, may yara sang masobra 15 ka mga barangay ang nangin apektado sa diin nagalab-ot sa malapit sa 3,000 ka pamilya ukon masobra 11,000 ka mga indibidwal sa bug-os nga banwa.
Pahayag pa niya, ang sektor sang agrikultura ang may pinakadaku nga halit ilabi na ang mga mangunguma nga bag-o lang nag-umpisa sang ila pagpananum.
Dugang pa sang natungdan, padayon ang pagtan-ay sang bulig sang lokal nga gobyerno sang banwa kag ginalauman nga sa pagdeklara sang state of calamity, mapadasig ang pagpangayo sang bulig sa national government.
Interviewed by: Bombo Francis Biñas via Bombohanay sa Udto
