ROXAS CITY – May yara na sang tikang nga ginadihon si President Roxas Mayor Receliste Escolin agud malikawan ang paglapta sang Paralytic Shellfish Poisoning sa ila banwa ilabi na sa mga coastal barangays.
Sa interview sang Bombo Radyo kay Escolin, ginpahayag sini nga sumugod naglupok ang isyu nga may yara sang pila ka mga kabanwahan nga apektado sang ginapahayag Red Tide Toxin, gilayon sini nga ginmanduan ang katapo sang Department of Agriculturist sang ila banwa agud tsekyaron ang sitwasyon sang ila kalalawran ilabi na ang mga coastal area nga ginakuhaan sang mga panginhason subong man ang pagmando nga ipalab-ot kag ipahibalo sa mga pumuluyo nga likawan ang pagpangkuha, pagbaligya kag pagkaon sang mga panginhason agud malikawan ang kaangay natabo sa pila ka mga banwa.
Naglibot man suno diri ang iya mga opisyales, agud masiguro nga nagakooperar ang mga pumuluyo sang ila banwa bangud suno sa alkalde, mas maayo nga mas temprano pa lamang mangin aligmat na kag indi na maghulat nga may yara pa sang ma-ospital ukon madulaan sang kabuhi bangud lamang sa kagustuhan.
Pahayag sang alkalde, pananglitan nga magdugay ang subong sini nga sitwasyon kag mangin apektado na ang mga pumuluyo ilabi na ang ginapangabuy-anan ang pagpangkuha sang panginhason, magatan-ay ang ila banwa sang mga foodpack agud makabulig kag makapiyan-piyan sa ila mga kinahanglanon.
Mensahe sini sa mga pumuluyo sang President Roxas, sundon lamang ang ila ginapatuman nga mga tikang bangud ini indi lamang para sa iya kundi subong man para sa kaayuhan sang tanan.
