SAPIAN, CAPIZ – 50 porsyento na nga drug-free ang banwa sang Sapian.
Ini ang kasunod sang ginpatigayon nga balidasyon sang mga katapo sang Philippine Drug Enforcement Agency (PDEA) Regional 6.
Suno sa Public Community Relation (PCR-PNCO) sang Sapian Municipal Police Station nga si Police Staff Sergeant Catherine Latoja, lima sa napulo ka mga kabaranggayan sa amo nga banwa ang natigayon na nga mahilway sa ilegal nga droga sandig sa mga rekisitos nga kinahanglan ma-comply agud ma-deklarar sila nga drug-free barangay.
Ang mga kabaranggayan nga ginakabig na nga drug-free sa nasambit nga banwa amo ang mga barangay sang Agsilab, Agtatacay Sur, Agtatacay Norte, Majanlud, kag Damayan.
Ginapasalamatan man sang pulisya ang hugot nga kooperasyon sang mga drug surrenderers pinaagi man sa bulig sang Barangay Anti-Drugs Abuse Council (BADAC) sang ila tagsa ka mga barangay.
Ginalauman naman nga mahilway sa ilegal nga droga ang lima pa ka mga barangay sang Sapian kalakip diri ang Dapdapan, Poblacion, Lonoy, Maninang kag Bilao agud dalayon na nga madeklarar nga drug-cleared municipality ang nasambit nga banwa.
Ginklaro man ni Latoja nga lunsay ‘users’ ukon nagagamit lamang sang ilegal nga droga ang ila na-monitor sa amo nga banwa kag wala sang ‘pusher’ ukon nagaduso ukon nagabaligya.
