ROXAS CITY – Tatlo ka mga banwa na sa probinsiya sang Capiz ang ginpaidalom sa state of calamity bangud sa padayon nga pagtimbuok sang kaso sang balatian nga dengue.
Matandaan nga una na nga nagdeklarar sang state of calamity ang banwa sang Pontevedra kun sa diin nagalab-ot sa 200 ang numero sang mga nakaangkon sang dengue kag President Roxas nga may 156 ka mga kaso.
Ginsundan ini sang Sigma nga may 197 ka mga kaso pinaagi sang ginpapasar nga resolusyon sang konseho sang nasambit nga banwa.
Sa interview sang Bombo Radyo kay Sigma Sangguniang Bayan (SB) member Esperidion Pelaez, ginpahayag sini nga kasunod sang pagpaidalom sa state of calamity sa nasambit nga banwa, magamit na sang lokal nga gobyerno ang ila nga calamity fund agud mas mapasangkad ang ila kampanya kontra dengue.
Matandaan nga gindeklarar na man ang dengue outbreak sa bilog nga probinsiya pinaagi sa executive order nga ginpaguha ni Governor Esteban Evan ‘Nonoy’ Contreras.
Mahibaluan nga base sa datos sang Provincial Health Office kag Department of Health-Capiz, nagtimbuok sang halos 988% ang kaso sang dengue sa probinsiya kun sa diin naglab-ot na sa masobra 4, 200 ang napagkit nga kaso humalin Enero tubtob Hulyo, sini nga tuig.
