Nakabaton sang tag-isa ka unit sang 2.4 GL Toyota Tamaraw service vehicle ang mga banwa sang Sigma kag Pilar halin sa Provincial Government of Capiz subong nga Huwebes, Setyembre 3, 2026.
Ang paghatag sang duha ka service vehicle ginpatuman paagi sa panikasog ni Governor Fredenil H. Castro, bilang dugang nga suporta sa pagpalig-on kag pagpauswag sang serbisyo publiko sa duha ka kabanwahanan.
Ginalauman nga magamit ang mga service vehicle sa nagkalain-lain nga operasyon kag aktibidad sang mga Local Government, ilabi na sa pagpatuman sang mga proyekto, programa kag iban pa nga serbisyo nga nagakinahanglan sang mas episyente kag madasig nga transportasyon.
Personal nga gintugyan ni Governor Castro ang mga service vehicle sa mga lokal nga opisyal sang Sigma kag Pilar. Nag-upod sa pagbaton sang unit sanday Sigma Mayor Dante Rizal Eslabon, kaupod ang mga miyembro sang Sangguniang Bayan kag pila ka mga kapitan sang barangay, kag Pilar Mayor Arnold Perez.
Nagpahayag man sang ila pagpasalamat kag pag-apresyar ang mga lokal nga opisyal sa suporta nga ginhatag sang Provincial Government sang Capiz sa ila tagsa ka banwa.
Paagi sa sini nga programa, padayon nga ginapalig-on sang Probinsya sang Capiz sa idalom sang liderato ni Governor Castro ang kapasidad sang mga banwa agud mas mapaayo, mapadasig kag mapalapad pa ang paghatag sang serbisyo publiko para sa kaayuhan sang mga pumuluyo sang probinsya.
