ROXAS CITY – Ginpaidalum na sa general lockdown ang banwa sang Tapaz bangud sa pamahog sang Coronavirus ukon COVID-19.
Ginkumpirma sa Bombo Radyo ni Mayor Roberto Palomar nga pinaagi sa Executive Order No. 20-03-13, istrikto nga ginpatuman ang general lockdown sa ila banwa epektibo alas 5 sini nga hapon.
Katuyuan sini nga magtenir sa ila panimalay ang mga pumuluyo sang Tapaz kag indi basta na lamang makasulod ang indi mga residente sa banwa agud indi maglapta ang makatalagam nga COVID-19.
Klaro man sa EO suno sa alkalde nga indi na makasulod sa ila banwa ang indi mga residente magluwas lamang sa naga-deliver sang pagkaon, bulong kag mga empleyado sang gobyerno.
Ginapatuman man ang mandatory quarantine sa nagaguwa nga mga residente sa diin sa ila nga pagbalik, kinahanglan nga mag-agi sila sa centralized quarantine section bilang precautionary measures.
Obligado man nga magpakita sang barangay quarantine pass ang mga residente nga magapadulong bisan sa kaingud lamang nila nga barangay ukon bisan diin nga area sa guwa sang ila gina-estaran nga doog, agud malimitahan ang ila nga hulag.
Bukas man ang mga tindahan sa banwa sang Tapaz apang ginapatuman lamang ang social distancing.
Nagpahanumdum man ang alkalde sa iya mga constituents nga matapos makapamalaklon, magpauli na sa ila mga balay kag indi na maglagaw bangud indi sigurado kun sin-o na ang nagasuprer sang amo nga balatian.
Ginpasiguro man ni Mayor Palomar nga may salabton ang sin-o nga magalapas sa ginpapanaug nga Executive Order angut sa health quarantine program.
Bilang dugang nga precautionary measures, gin-activate na ang Incident Command System sa ila banwa, agud maproteksyunan ang mga Tapaznon.
Samtang ginkumpirma sang alkalde nga may yara sila sang mga Person’s Under Monitoring (PUM’s) nga gina-monitor, sa diin gikan ang mga ini sa iban nga lugar nga ginapatihan may mga kaso na sang COVID-19.
