Nagpatigayon ang Municipal Disaster Risk Reduction and Management Office (MDRRMO) sang banwa sang Panay, Capiz sang pagsinapol agud mapasangkad ang kahandaan batok sa posible nga epekto sang nagapadayon nga tig-ilinit nga tyempo nga dala sang El Niño phenomenon.
Sa interview sang Bombo Radyo kay Panay Capiz Mayor Jonathan “Sonny” Besa, iya ginpahayag nga ang pagsinapol amo ang preparasyon sang banwa batok sa posible nga epekto sang El Niño, ilabi na sa suplay sang tubig kag sektor sang agrikultura.
Suno sa alkalde, ginmandu-an niya ang tanan nga department heads sang Local Government Units nga maghatag sa ila mga rekomendasyon kag contingency measures agud makapreparar sa possible epekto sang El Niño.
Ginpahinumduman man ni Mayor Besa ang mga mangunguma nga magpili sang nagaka-angay nga mga pananom bangud posible sa gihapon nga maka-eksperyensya sang dry spell bisan sa tunga sang tig-ululan.
Padayon naman nga ginamonitor sang Local Government Unit ang sitwasyon agud masiguro nga may nagakaigo nga mga tikang para maprotektahan ang pangabuhian sang mga residente kag malikawan ang daku nga halit sang El Niño phenomenon sa komunidad.
