Nakabaton na sang Barangay 3 sa Roxas City ang ₱200,000 nga pinansyal nga bulig paagi sa Bawat Barangay Makikinabang Program.
Sa interview sang Bombo Radyo kay Punong Barangay Nelson Ignacio, iya ginpahayag nga sundon sang barangay ang mga guidelines sa pag-release kag paggamit sang nasambit nga pondo.
Suno kay Ignacio, magapatawag ang ini sang pagsinapol kaupod ang mga barangay officials agud masiguro nga mangin husto kag transparent ang pag-release sang ₱100,000 nga igahatag bilang educational assistance sa mga kwalipikado nga college students sa lugar.
Samtang, ang nabilin nga ₱100,000 pagagamiton para sa mga proyekto kag serbisyo nga makabulig sa komunidad.
Ginpahayag man sini nga kinahanglan nga masunod ang nagakaigo nga proseso kag guidelines agud masiguro nga ang pondo magamit sa husto kag makabenepisyo gid sa mga residente sang Barangay 3.
