Ginpirmahan na ni Presidente Ferdinand Marcos Jr. bilang layi ang Republic Act No. 12326 nga nagapaiway sang Barangay kag Sangguniang Kabataan Elections (BSKE) kag nagapalawig sang termino sang mga opisyal sang barangay kag SK sa lima ka tuig.
Suno sa Presidente, ang dugang nga tion sa termino sang mga lokal nga opisyal dapat gamiton para mapauswag ang serbisyo sa mga residente, matapos ang mga programa nga ginapatigayon na, kag masabat ang mga kinahanglanon sang mga komunidad kag sang kabataan.
Ginpahayag ni Marcos nga ang dugang nga tion sa pagserbisyo dapat mangin dugang man nga oportunidad agud makaserbisyo sa pumuluyo.
Dugang pa sang Presidente , ang pagpalawig sang termino may kaangtanan sa mas daku nga responsibilidad kag salabton sang mga opisyal sa ila mga constituents.
Ini nga bag-o nga layi ang kasunod sang Republic Act No. 12232, nga ginpirmahan ni Marcos sang 2025 nga nagpaiway sang BSKE sang Disyembre 2025 pakadto sa Nobyembre 2026 kag gintalana ang termino sang barangay kag SK officials sa apat ka tuig.
Apang sa bag-o nga RA 12326, ginpalawig ang termino sang mga barangay kag SK officials sa lima ka tuig.
Nagahatag ini sang bag-o nga framework para sa palaabuton nga Barangay kag Sangguniang Kabataan Elections.
Pinaagi sa bag-o nga layi, ginapaabot nga ang mga barangay kag SK officials may mas malawig nga tion agud ipadayon kag tapuson ang ila mga programa kag proyekto para sa ila mga komunidad.
