ROXAS CITY – Dungganon nga makabig sang mga pumuluyo sang Barangay Bago sining syudad ang kadalag-an nga nabaton sang ila barangay matapos nagaisahanon ini nga barangay nga nakabaton sang 2021 Seal of Good Governance gikan sa DILG.
Sa interview sang Bombo Radyo kay Kapitan Ely Azzaraga, Punong Barangay sang Barangay Bago, Roxas City, ginsiling sini nga kalipay niya kag sang iya pumuluyo ang nabaton nga pagkilala bilang isa sa maayo nga pagdumala sang barangay.
Ginpahayag ni Kapitan, rason sang nasambit nga kadalag-an ang bangud sa kooperasyon sang pumuluyo, mabakas nga Barangay Health Workers (BHW) kag madasig nga mga Barangay Tanod.
Nagsumiter sila suno diri sa gin-obligar nga mga rekisitos sang DILG kaangay sang mga proyekto sa ila barangay, madasig nga pagresponde sa tion sang emerhensiya, kag aktibo nga mga tinawo sa barangay.
Nagapati si Kapitan Azzaraga nga nangin maayo kag nalipay sa resulta sang ebalwasyon ang DILG rason nga isa ang ila barangay sa ginpili.
Luyag naman magpasalamat ni Kapitan sa iya mga Kagawad, Brgy. Tanod, kag pumuluyo nga nagkooperar sa gin-obligar nga rekisitos sang DILG.
