Pabor ang mga opisyal sang Barangay Cagay sa ginaduso nga ordinansa ni City Councilor Fernando Luis Viterbo nga magpatuman sang mandatory drug testing sa tanan nga opisyal kag empleyado sang Local government unit sa syudad sang Roxas.
Ini agud masiguro nga wala sang opisyal ukon empleyado sang gobyerno nga nagagamit sang ilegal nga druga.
Sa interview sang Bombo Radyo kay Barangay Kagawad Isidro Aragon, iya ginpahayag nga dako nga bulig ang mandatory drug test agud mapasangkad ang integridad kag kredibilidad sang mga opisyal sa serbisyo publiko.
Suno kay Aragon, importante nga ang mga opisyal sang barangay mangin maayo nga ehemplo sa ila mga nasakupan.
Dugang pa niya, ang mandatory drug testing isa man ka preventive measure agud maprotektahan ang gobyerno kag ang publiko batok sa impluwensya sang ilegal nga druga.
