Ginkabig sang Barangay Council sang Barangay Cagay sa Roxas City nga ‘peaceful’ kag wala sang seryoso nga insidente ang pagbisita sang mga pumuluyo sa patyo bilang kabahin sang pagdumdom sa ila mga pinalangga nga nagtaliwan sa pagsaulog sang tigkalalag.
Sa interview sang Bombo Radyo kay Punong Barangay Arthur Aragon, ginpahayag sini nga sa kabug-usan, malinong ang sitwasyon sa patyo bangud sa kooperasyon sang mga pumuluyo kag bulig sang mga kapulisan kag Traffic Management Unit nga nagbulig sa pagmintinar sang seguridad sang trapiko sa palibot sang patyo.
Dugang pa sini, padayon ang pagmonitor sang barangay officials kaupod ang mga nagabulig nga ahensya agud masiguro ang seguridad sang mga nagabisita, ilabi na sa mga adlaw nga madamo ang nagatipon agud magpangamuyo kag maghatag sang pagrespeto sa ila mga nagtaliwan nga himata.
Samtang, ginalauman sang natungdan nga mangin kaangay man ang malinong nga sitwasyon subong nga All Souls’ Day, bangud mas madamo pa nga pumuluyo ang ginapaabot nga magabisita sa patyo agud magdumdom kag magpangamuyo para sa ila mga pinalangga nga nagtaliwan na.
