Padayon ang hugot nga pagbantay sang Barangay Council sang Barangay Cagay sa Roxas City agud mapabilin ang kalinong kag katawhay sa lugar, ilabi na sa nagahilapit nga pagdugok sang mga tawo sa Cagay Cemetery para sa Tigkalalag.
Sa interview sang Bombo Radyo kay Barangay Kagawad Isidro Aragon, iya ginpahayag nga magapahamtang sila sang mga barangay tanod sa palibot agud magbulig sa mga otoridad sa pagmintinar sang seguridad kag katawhay.
Suno kay Aragon, tubtob alas dos sang aga ang ila nga paglibot para mas maid-id ang pagtsekyar sang kada sitio sang barangay.
Nagpanawagan man ang natungdan sa publiko nga magkooperar sa mga otoridad, magsunod sa mga ginapatuman nga pagsulundan kag magpakita sang disiplina agud masiguro ang malinong nga palibot.
