Nagapreparar na ang Barangay Council sang Barangay Cagay, Roxas City sa posible nga epekto sang Super El Niño, ilabi na ang posibilidad sang kakulangon sang suplay sang tubig bangud sa malawig nga tig-ilinit.
Sa interview sang Bombo Radyo kay Barangay Kagawad Isidro Aragon, iya ginpahayag nga may yara sila sang mga bubon, poso kag iban pa nga water sources nga mahimo masaligan sang mga residente sa tion nga magkulang ang suplay sang tubig.
Suno kay Aragon, handa man ang barangay council nga maghatag sang bulig sa mga residente nga magakinahanglan sang suporta bangud sa epekto sang malawig nga tig-ilinit.
Nagpahanumdom man ang natungdan sa mga residente nga maghalong, magkinot sa paggamit sang tubig kag maghimo sang nagakaigo nga pagpanghanda agud maproteheran ang ila kaugalingon batok sa posible nga epekto sang Super El Niño.
