Nagpahayag sang pagpasalamat ang Barangay IX ukon Railway sa pagpili sa ila nga barangay bilang isa sa mga pagabutangan sang police outpost, nga ginapaabot makabulig sa pagpauntat sang mga problema sa komunidad kag pagpalig-on sang seguridad.
Sa interview sang Bombo Radyo Roxas kay Ma’am Teresa Golbiogo, sekretarya sang Barangay IX, iya ginpahayag nga paagi sa pag-activate sang outpost, magabuligay ang Philippine National Police (PNP), kag Barangay Council sa kampanya kontra droga kag pagmintinar sang katawhayan. Ginapaabot man nga may 24-oras nga duty ang mga personnel agud mas madasig nga makabulig sa mga residente.
Suno kay Golbiogo, may yara na sang police outpost sa lugar malapit sa Bayot Drive, samtang ginapangita pa sang barangay ang angay nga lokasyon para sa ikaduha nga outpost. Ginalantaw man ang posibilidad nga ibutang ini sa lugar nga may koneksyon sa CCTV.
Gina-agda man sang opisyal ang mga pumuluyo nga magbulig sa Barangay Council, kag kapulisan agud mapadayon ang katawhayan kag seguridad sa Barangay IX.
