ROXAS CITY – Ginpaidalom sa Enhance Community Quarantine (ECQ) ang Barangay Culasi sining siyudad matapos nga nag positibo sa Rapid Test ang misis sang ila chief tanod.
Ini ang ginpahayag ni Barangay Kagawad Enrico Joseph sang mainterview sang Bombo Radyo.
Suno kay Kagawad Joseph nga wala sang travel history ang nasambit nga indibidwal sa mga lugar nga infected sa Coronavirus Disease.
Ang wala na ginhingadlan nga persona ang residente sang Sitio Sacup sa nasambit nga barangay kag ginabulong na sa Roxas Memorial Provincial Hospital.
Ini bangud nakabatyag sang pila ka mga sintomas sang COVID-19 ang amo nga ginang rason nga igapaidalom ini sa Real-Time Polymerase Chain Reaction ukon RT-PCR Test.
Samtang, ang mga himata naman sini nga iya naka-close contact ang nagapabilin karon nga naka-strict home quarantine sa ila balay.
Nahibaluan nga nagpatawag sang sinapol ang barangay council sang nasambit nga barangay kasunod sang pagpositibo sa Rapid Test sang isa nila ka residente.
Nahibaluan nga nagtawag ang City Health Office sa opisyales sang barangay agud ipahibalo ang nasambit nga balita.
Bangud diri gilayon nga nag rekorida kag nagpatigayon sang sinapol ang mga opisyales sang barangay kaupod ang mga otoridad agud maghimo sang tikang batuk sa nasambit nga balatian.
Samtang, nagalab-ot naman sa 9 ang mga Locally Stranded Individual’s (LSI’s) nga naka-quarantine sa quarantine facility sang nasambit nga barangay.
