ROXAS CITY – May mga ginadihon na nga lihok ang mga opisyales sang Barangay Dayao, Roxas City kasunod sang pagkakompirmar nga residente sang amo nga barangay si Patient No. 32, ang 60 anyos nga babaye nga napatay kag nagpositibo sa coronavirus disease (COVID-19).
Ini ang ginpahayag ni Punong Barangay Emily Ariza sang mainterview sang Bombo Radyo.
Suno kay Ariza, gilayon siya nagpatawag sang isa ka sinapol sa mga opisyales sang barangay kalakip na ang Barangay Health Workers (BHW’s), Barangay Health Emergency Response Team (BHERT) kag iban pa agud hinalaan ang ila pagahimuon nga mga tikang batuk sa (COVID-19).
Diri ila nakasugtan suno sa opisyal nga hugot na nga dumilian ang mga pumuluyo sa pagguwa sa ila tagsa ka mga balay sa sulod sang 14 diyas magluwas lamang sa mga home quarantine pass holder.
Hugot man nga pagadumilian ang mga indi sang residente sang Barangay Dayao nga makasulod sa barangay.
Samtang, paga-tsekyaron kag usisaon man ang tanan nga nagalabay gikan sa kaiping nga mga kabaranggayan kun may yara sila sang quarantine pass.
Plano man sang opisyal nga mag-request sa gobyerno sang siyudad sang police assistance nga magabulig sa ila hugot nga implementasyon sang checkpoint sa ila lugar.
Mahibaluan nga si Patient No. 32 nga residente sang amo nga barangay ang may yara sang travel history sa Dubai, United Arab Emirates.
Sadtong Marso 28, 2020 sang gindala ini sa ospital kag na-confine kag napatay pagka-Marso 29, 2020.
