ROXAS CITY – Ilabi pa nga ginpahugot sang gobyerno sang siyudad ang pila ka mga lihok sini batuk sa coronavirus disease (COVID-19).
Ini ang kasunod sang pagkapagkit sang ikaduha nga kaso sang amo nga balatian nga narekord sa Barangay Dayao, Roxas City.
Suno kay Roxas City Mayor Ronnie Dadivas, ginmandu sini ang pagpaidalom sa nasambit nga barangay sa Extreme Enhanced Community Quarantine.
Ginpahayag sang alkalde nga temporaryo nga pagasaraduhan ang mga natumod nga lugar, sitio ukon compound kun sa diin naghalin ang isa ka COVID-19 positive sa siyudad.
Ang natumod nga mga lugar suno sa alkalde ang pagabantayan sang mga opisyales sang barangay, mga miyembro sang Philippine National Police ukon Philippine Army.
Nagpasalig man ang alkalde nga igahatag ang mga importante nga kinahanglanon sa lugar kalakip na sang mga persona nga natumod sa contact-tracing sa Barangay Dayao, Libas kag Barra.
Pagabantayan ang mga ini sang mga otoridad kun sa diin indi sila mahimo makaguwa kag makasulod sa compound ukon sitio bisan pa sila ang may yara sang quarantine pass.
Ang mga naghalin naman sa kaiping nga mga barangay ang mahimo mag-agi sa baylo nga may yara sila sang iga-presentar nga quarantine pass.
Ginapahanugutan naman nga makasulod ang mga nagadala sang essential goods kag traders apang kinahanglan nila magpaidalom sa quarantine procedures kalakip na diri ang thermal scanning.
Ginpahayag sang alkalde nga prayoridad sini ang kaluwasan kag ikaayong-lawas sang mga pumuluyo sa siyudad.
Bangud diri, nagahinyo siya sang kooperasyon kag paghangop sa publiko ilabi na sa mga lihok nga ginapatuman sa kampanya kontra COVID-19.
