ROXAS CITY – Ginkumpirmar sang Commission on Elections (COMELEC) nga nag-file sang petisyon si Election lawyer Atty. Romulo Macalintal sa Korte Suprema nga nagakuwestiyon sa ginpapasar nga RA 11935 ukon ang layi nga naga-postpone sang Barangay kag SK Elections.
Sa interview sang Bombo Radyo kay Atty. Wil Arceño, Provincial Election Supervisor, ginklaro sini nga ang Barangay Election lamang ang ginkuwestyon ni Macalintal kun ngaman ginpaiway.
Sandig sa petisyon sang Election lawyer, nakasaad nga aminado si Macalintal nga may gahom ang Kongreso nga mag-set sang election qualifications kag term of office, apang wala sang gahum suno diri ang Kongreso sa pagpostpone sang Eleksyon, sa baylo, ang authority of power ang yara sa COMELEC nga basehan ang Omnibus Election Code.
Gilayon nga nag-aksyon ang Korte Suprema kag bangud sini, natalana nga patigayunon ang oral arguments sa adlaw sang Biyernes, Oktubre 21.
Kun paboran sang Korte Suprema ang petisyon ni Macalintal, magapapanaog sang Temporary Restraining Order (TRO) ang Supreme Court, kag bangud sini, madayon ang BSK Elections sa Disyembre 2022, apang kun indi, pagahiwaton ang eleksyon sa masunod nga tuig.
Kadungan sang sini nga petisyon ni Macalintal, nagmandu ang COMELEC Chairman nga magpadayon sa preparasyon ang tanan nga talatapan sa pungsod, bangud wala ginadula sang ahensiya ang posibilidad nga paboran sang Korte Suprema ang petisyon ni Macalintal.
Sa karon, ginahulat sang ahensya ang mangin desisyon sang pinakamataas nga Korte, angut sa kun sin-o ang pagapaboran sa sini, nga labing-una nga hitabo sa kasaysayan.
