PONTEVEDRA, CAPIZ – Ginatudlo karon nga suspek sa pagluthang-patay sa mag-utod sa isa ka binaylihan sa Sitio Rosario, Barangay Lantangan, Pontevedra, Capiz ang mismo kagawad sang amo nga barangay.
Mahibaluan nga dead on the spot ang isa sa mga biktima nga si Felome Bangud, 42 anyos samtang ginbawian naman sang kabuhi samtang ginabulong sa ospital ang manghod sini nga si Melfer Bangud, 34 anyos.
Antes ginbawian sang iya kabuhi sa ospital, ginapahayag nga nakatuad pa si Melfer nga si Barangay Kagawad Joseph Manican, 53 anyos ang nagluthang sa ila nga mag-utod.
Samtang, sa interview sang Bombo Radyo kay Kagawad Ronald Valois, ginpahayag sini nga wala pa man natabo ang krimen, nagpalapit na sa iya si Melfer kag nagpahayag nga luyag nila nga ma-‘arbor’ si Manican.
Apang ginsaway niya ini kag pila ka ginutlo lamang ang nakaligad sang ginpalapitan ni Melfer si Manican kag gindusak gamit ang screw driver.
Suno pa diri, magluwas sa screw driver, nasiplatan pa nga may dala nga binangon si Felome.
Samtang nagluntad ang komosyon, nagdinalagan ang mga tawo sang mabatian ang asud-asod nga lupok sang armas-luthang kag nakit-an na lamang ang nagahuray-ad nga mag-utod nga lunsay may igu sa lawas.
Indi naman mapat-od ni Valois kun ang kaupod sini nga si Manican ang nagluthang sa mga biktima bangud suno sa iya wala man sini matalupangdan nga may bitbit ini nga armas-luthang.
