Barangay kagawad ginbuno sang hubog gamit ang icepick

ROXAS CITY – Pilason nga ginpadangat sa ospital ang 33-anyos nga barangay kagawad matapos nga bun-on gamit ang icepick sang isa ka hubog nga lalaki sa Barangay Quevedo, Maayon.

Nag-angkon sang pilas sa likod si Kagawad Renegene Julian makaligad nga ginbuno sang suspek nga si Agusto Castillon 40-anyos sang Barangay Quevedo, Maayon, Capiz.

Ginsablay sang kagawad nga biktima ang suspek nga nagama-uy kag nagatuga sang kagamo sa lugar sang hinali lamang nga nagkuha ini sang icepick kag ginbuno sa likod si kagawad Julian.

Gilayon nga gindala sa ospital ang biktima agud madapatan sang pagbulong samtang ginapangita na sang kapulisan ang suspek nga nagpalagyo matapos ang insedente.