ROXAS CITY — Wala sang madalum nga motibo kundi hinubog gid lamang ang gintunaan sang kamatayon sang isa ka barangay kagawad kag 19-anyos nga soltero nga natiruhan kag nalab-an sa Barangay New Guia sa banwa sang Maayon, Capiz.
Suno kay PO2 Ryan Descalzota, imbestigador sang Maayon PNP, magkaupod pa nga nag-inum ang mga napatay nga sanday barangay kagawad Ruperto Dumuos kag Angelo Dunton Jr., sa manokan sang opisyal sa amo man nga lugar.
Apang sang mauntat na sa pag-inum si Dumuos, nagpamilit si Dunton nga mapadayon pa sila tubtob nga nagluntad ang mainit nga sabtanay sa tunga sang duha kag sila ang nagsumbaganay.
Nagpauli si Dunton kag nagpaandam nga magakuha ini sang armas kag ginsundan man ini sang kagawad.
Nagbalik ang soltero nga kaupod na ang iya mga himata kag sang nagsugataay sila ni Dumuos sa karsada, liwat naman sila nga nagkumprontahanay.
Didto kag hinali na lamang nga ginluthang ni Dumuos si Dunton sang makaduha ka beses sa lawas gamit ang wala pa matumod nga kalibre sang armas luthang.
Sang nakita sang amay nga si Angelo Dunton Sr., nga natumba ang iya bata, ginlabo man niya sang espading sa tangkugo si Dumuos.
Sang nagresponde ang mga kapulisan, amo pa lamang nila kag madala sa ospital ang duha, apang gindeklarar ang mga ini nga dead on arrival.
Samtang, pursigido naman nga magpasaka sang panumbungon batok kay Dunton Sr., ang pamilya sang barangay kagawad.
Mahibaluan nga nagsungka man sa Maayon PNP si Dunton pila ka oras matapos nga ginlabo-patay niya si Dumuos.
Wala naman marekober ang indi pa matumod nga armas luthang nga gingamit sang kagawad sa pagtiro-patay sa bataon nga Dunton.
