ROXAS CITY-Nagreklamo sa Roxas City Police Station ang isa ka barangay kagawad matapos nga ginhaboy sang botilya ang ila patrol car sa Purok 2, Barangay Dayao, Roxas City.
Sandig sa ginpabalhag ni Barangay Kagawad Wennie Batuampo, 34-anyos sang nasambit nga lugar nga samtang nagapatigayon sila sang pagpatrolya sa barangay hinali na lamang nga may naghaboy sang botilya sa ila nga patrol.
Gilayon nga nagpundo ang nasambit nga mga opisyales sang barangay kun sa diin nakita si certain Michael Vasquez nga amo ang naghaboy sa ila.
Gindugang pa ni Batuampo nga samtang nagapanawag sila sang Police Assitance, liwat sila nga ginhaboy sang botilya ni Vasquez kadungan sang paghangkat sa ila sang inaway.
Samtang sang nag-abot na ang nagrespondi nga mga kapulisan, ginaalegar nagbato pa si Vasquez kag ginpahog ang nagrespondi nga pulis.
Bangud diri, naguba ang signal light sang ila nga salakyan.
Maswerte naman nga wala man sang may napilasan sa amo nga insidente.
